Akwarius

Sentraal in hierdie spanningsroman is 'n klomp dolfyne wat gedurende die Koue Oorlog deur Rusland gebruik is om sabotasiewerk te doen. 'n Suid-Afrikaanse dieresielkundige, ene Anton Dreyer, word, in die huidige klimaat van demokrasie en diereregte, gehuur om hierdie dolfyne te deprogrammeer - hulle mag nie van kant gemaak word nie, hulle moet hul nare streke afleer. Hy werk saam met 'n pragtige Russiese dolfynafrigter, Sasja. Daar is uit die staanspoor ‘n erotiese spanning tussen hulle en dit word weldra 'n vuurwarm verhouding. Die paar kom egter te staan teen 'n misterieuse booswig, ene Edelweiss, wat van die dolfyne steel om aan vermaaksentra wereldwyd te verkoop. Edelweiss se boot is die Jan Wandelaar, 'n moderne variant op die Vliegende Hollander, die vervloekte spookskip wat glo storms om die Kaap veroorsaak. Hy lei Anton en Sasja onder meer deur allerhande letterkundige leidrade in 'n doolhof van gevaar, waansin en uiteindelike ondergang. Dit is 'n apokaliptiese roman waarin elke teer moment besmet is met iets dreigends. Selfs Anton se aangetrokkenheid tot Sasja het wesenslik iets te make met sy onbewuste doodsverlange, sy sluimerende behoefte om saam met die dolfyne weg te sink in die oneindige vegetelheid van die diepsee, om hom oor te gee aan die begin en einde van alles, aan die oermoment toe alles nog water was.