Main centres: | 1-3 business days |
Regional areas: | 3-4 business days |
Remote areas: | 3-5 business days |
Hierdie Nederlandse Statebybel is gedruk in 1649, dus slegs 12 jaar na die verskyning van die eerste Statebybel in 1637. Gedruk in 1649, is hierdie Statebybel vanjaar ñ volle 375 jaar oud. Die Statebybel was uitgegee te s'Graven-Hage deur die Weduwee en Erfgename van wyle Hillebrant Jacobsz van Wouw, en die drukwerk was behartig deur Paulus Aertsz van Ravesteyn. Op die keersy van die voorste titelblad is die Statebybel onderteken en met die hand gedateer deur Barend Langenez.
Die afmetings van hierdie folio formaat Statebybel is 40cm x 26cm x 13cm.
Soos alle folio formaat Statebybels uit die 1600's en 1700's bevat hierdie Statebybel die Ou Testament, die Nuwe Testament, en ook die Apokriewe Boeke.
Statebybels van 350 plus jaar oud duik nie gereeld op nie, en wanneer dit wel gebeur, dan is die Bybels dikwels onvolledig en in gehawende toestand. Hierdie Statebybel verkeer egter in ñ bogemiddelde goeie toestand vir sy ouderdom. Die Bybel is 100% volledig, alle bladsye is daar, en die teksblok sit mooi stewig in sy buiteblad. Die bindwerk is goed en die Bybel kan met vrymoedigheid hanteer word, uit die aard van die saak wel op ñ simpatieke manier soos wat dit hoort by ñ kosbare Boek wat 375 jaar oud is.
Hierdie Statebybel het nog sy volledige en oorspronklike geelkoper hoek-beslag (agt hoekies) tesame met sy twee geelkoper middel-ornamente soos wat hy 375 jaar gelede gekom het uit die drukkery van Paulus Aertsz van Ravesteyn. Die twee knippe ontbreek ongelukkig.
Hierdie Statebybel het eenmaal in sy leeftyd restorasie werk ondergaan, en in die proses is sy leer rugkant vervang. Die heel belangrikste van alles is dat hierdie restorasie werk betyds onderneem was om verdere agteruitgang te stuit.
Statebybels van 375 jaar oud was in hul leeftyd baie gebruik, en dit kan ook gesien word aan hierdie eksemplaar. Die Statebybel toon dan ook slytasie en gebruikspore in ooreenstemming met sy ouderdom.
Dit is sulke Statebybels wat Jan van Riebeeck en ons vroegste voorvaders (die stam-vaders van Afrikaner families) vanuit Nederland saam gebring het met die volksplanting aan die Kaap.