Die Buffel Struikel - L. J. Bothma

In hierdie boek is ons nie die helde en die vyand die skurke nie. Maar ook nie andersom nie - soos sommige miskien uit die titel sou wou aflei nie.

Op stuk van sake was 32 Bataljon nie 'n verslane mag wat aan die einde van 'n oorlog aan 'n vyand oorgegee het nie. Dit was 'n eenheid wat ontbind is deur die opperbevelhebber van die land se gewapende magte - die politieke staatshoof. Na 'n besoek aan "die grens" in 2001 het ek besluit om 'n boek te skryf oor die Grensoorlog, en spesifiek 32 Bataljon, waar ek in 1978 'n pelotonbevelvoerder was.

Dit moes 'n boek wees, nie nét vir 'n militêre gehoor nie, maar veral vir die mense wat nooit die Grensoorlog gesien en verstaan het nie; vir ons ouers, vrouens en kinders - vir almal wat respek het vir die geskiedenis en die waarheid oor daardie oorlog wil hoor.