Die eerste 5 minute na die dood

Skrywer: Isak Burger

Formaat: Medium Sagteband

Toestand: Baie Goed

Die belangrikste oomblikke in n mens se lewe is die eerste vyf minute na die dood. Die woorde het by my vasgesteek en my laat dink: Waarom vyf minute na die dood? Toe het ek besef dat hierdie eerste oomblikke na die dood elke mens wat op aarde geleef het, duidelik en finaal tot die besef sal laat kom dat dit wat hy of sy in hierdie lewe geglo of nie ge-glo het nie, waar en die moeite werd was of nie was nie. Dit sal die wonderlikste oomblikke wees vir die wat dan besef: Dit wat die Bybel geleer het, is waar; my verlossing deur Christus, my weergeboorte, was eg; my toewyding en geloof was die moeite werd. Aan die ander kant sal dit n oomblik van die grootste ontnugtering en wanhoop wees vir die onverskillige, die ongelowige, die ateis en die agnostikus, wanneer die finaliteit en vreeslikheid van God se oordeel oor hulle losbreek. Vir die ongelowige sal alles dan te laat en tevergeefs wees. Die eerste vyf minute na die dood vir sommige die wonderlikste oomblikke, vir ander die vreeslikste oomblikke van hulle bestaan. Ek besef dat n mens eintlik nie van vyf minute na die dood kan praat nie, want met die dood beweeg ons in n dimensie in waar tyd nie meer bestaan nie. Die verhaal wat Jesus vertel het en waaroor ek met jou in hierdie boek gesels, speel egter direk na die dood af, toe die afgestorwenes aan die ander kant aankom en die werklikheid van die lewe na die dood ontdek. Vir ons wat nog in die dimensie van tyd en ruimte leef, maak dit dan net sin om van vyf minute na die dood te praat.