Africana Uitgewers. Sagteband. 160bladsye. Baie netjiese toestand. 

Die VOC-skip Schoonenberg het op 20 November 1722 naby Kaap Agulhas gestrand. Deur voort te borduur op historiese gerugte dat waardevolle artikels van die wrak na Vergelegen geneem is, waar dit verdwyn het, en deur name wat in dokumente genoem is, te gebruik, is n verhaal van sameswering, n doelbewuste stranding, n versteekte skat, moord en wrede straf bedink en die eerste keer in 1951 deur Eric Rosenthal gepubliseer. Hierdie storie word steeds herhaal, dikwels as histories juis. Oorvloedige materiaal uit die argief vertel n radikaal ander ware Schoonenberg-verhaal. n Vorige artikel het die stranding en daaropvolgende ondersoek deur die fiskaal na die oorsake van die ramp beskryf. Die Raad van Justisie het die skipper en sy offisiere aan nalatigheid skuldig bevind, maar niemand is tronkstraf opgelê nie en almal is uiteindelik terug na Nederland. Hierdie artikel beskryf gebeure ná die stranding. Alle bergingsmoontlikhede is deur die Goewerneur en Politieke Raad oorweeg, en voorrade en drie sendings is na die wrak gestuur, die laaste om dit te gaan verbrand. Op bevel van die Here XVII het die nuwe fiskaal vroeg in 1726 tevergeefs bewerings van strandroof teen skipper Van Soest ondersoek. Beëdigde verklarings is verkry dat goed afkomstig van die skip op Vergelegen afgelaai is, maar sonder bevestigende bewysstukke. Van der Heijde, eienaar van Vergelegen, het van niks geweet nie. Daar is geen getuienis dat enigiemand van strandroof aangekla is nie. In 1985 is kanonne, ankers, glasstukke en gespes wat met die tyd van die Schoonenberg verbind kon word, naby die hawe van Struisbaai gevind.