DIE STRYD TUSSEN BOER EN BRIT- M.C.E VAN SCHOOR

Book: Paperback. Good condition. 1999 edition. 328 pages. First edition.

Review in Die Burger:

MARTIENS VAN BART

DIE oorspronklike skrywe van die oorlogservaringe van die Boere generaal Christiaan Rudolph de Wet het hy in 1902, pas ná die Vrede van Vereeniging, aan boord van die Saxon gedoen. Dit was toe hy saam met genls. Jan Smuts en Louis Botha na Europa is om geld vir noodleniging aan die Afrikaner volk in te samel. Die titel van die boek was De Stijd tusschen Boer en Brit.

Die werk, wat ds. John Daniel Kestell persklaar gemaak het, beskryf hy as ``een van die groot oorlogsboeke . . . ongetwyfeld vir die toekomstige geskiedskrywers 'n bron van die grootste waarde''.

Dit is in Amsterdam gepubliseer en het algou die status van 'n klassieke werk oor die ABO verwerf.

In 1959 het J.J. Human dit in Afrikaans oorgeskryf en by Tafelberg Uitgewers laat verskyn.

Prof. M.C.E. (Tienie) van Schoor, kenner van die ABO en veral van die Vrystaatse Driemanskap, M.T. Steyn, J.D. Kestell en C.R. de Wet, het die boek met die oog op die honderdjarige herdenking van die stryd tussen Boer en Brit opnuut in Afrikaans oorgesit ``om as 'n meer getroue weergawe toeganklik te wees, en, veral oor die tydsafstand tussen die ontstaan van die werk en die hedendaagse navorser, deur middel van annotasie 'n noodsaaklike opheldering te bied''.

``Die vertaling word verder met kaarte van De Wet se vele bewegings en gevegsroetes toegelig. Die illustrasies in die werk is beperk tot bykans al die foto's wat tydens die oorlog van genl. De Wet geneem is, of waarop hy met sy staf of ander persone voorkom. Die foto's berus by die Oorlogsmuseum van die Boere Republieke se omvattende en unieke fototeek, of in die vertaler se eie private versameling,'' skryf Van Schoor in die voorwoord.

Ook die ``voorlopige'' notules van die vredesonderhandelings by Vereeniging in Mei 1902 en die besluit van die Afrikaner volksverteenwoordigers is in hoofstukke 36 en 37 opgeneem.