Die woestynplantjie - Sarah du Pisanie

Die Woestynplantjie - Sarah du Pisanie - JP van der Walt - 1998, tweede uitgawe - 152pp - Harde glansblad in baie goeie toestand - Intern skoon en stewig gebind.

In die ongerepte woestynwêreld van Suidwes-Afrika is dit slegs die geharde woestynplantjie wat die aanslae van die natuur en elemente kan weerstaan. Ongeag skroeiende winde, ‘n bloedige son en vrieskoue nagte, staan die woestynplantjie fier en regop en verleen skoonheid aan die dor en verlate landskap.

So ‘n woestynplantjie is Estelle Retief. Op ‘n sendingstasie in die woestyn het sy gewoond geraak aan die harde lewe, geleer om op haar eie voete te staan, maar ook om die klein dingetjies in die lewe te waardeer.

Na haar ouers se dood aanvaar Estelle ‘n betrekking as verpleegster en geselskapdame in die herehuis van baron Hein von Lindeque, waar sy die versorging van die baron se verlamde jonger broer moet behartig. Christo von Lindeque is ‘n verbitterde jong man, terwyl die baron onder die groot las van skuldgevoel al bykans afgeleer het om te glimlag.

Karin von Lindeque, hulle hooghartige stiefmoeder, skroom nie om haar misnoeë uit te spreek oor die “boerse skepseltjie” wat Christo moet versorg nie.

Na slegs een dag in die Von Lindeque-woning slaan Estelle byna op die viug. Maar ‘n geharde woestynplantjie laat hom nie sommer deur elke stormwind onderkry nie — en Estelle besluit om te bly!

Sarah du Pisanie het reeds ‘n tradisie geskep. Hierdie verhaal, wat speel in die dae van die Suidwes van ‘n paar dekades gelede, is geen uitsondering nie. Die woestynplantjie is suiwer leesgenot van begin tot einde!