Skrywer: Ena Murray
Formaat: Groot Sagteband
Toestand: Baie Goed
Lied van die Campino's
Petro Malan daag in Portugal by haar oorlede moeder se adellike familie op. Sy word egter geensins verwelkom nie. Die waardige marqueza D'Almeida se kilheid grens aan minagting; pierrewaaier Alberto en sy lieflike suster Paoula is openlik vyandig; en selfs die aantreklike gesinsleier, die oudste neef Raoul, tree eienaardig teenoor haar op.
Raoul verwar haar. As klein dogtertjie is Paoula aan hom toegesê as bruid. Die een oomblik lyk dit asof hy tog uit liefde met haar sal trou, maar dan is daar onteenseglik die sterk aangetrokkenheid tussen hom en Petro. Daar is ook aanslae op Petro se lewe, die wanhoop en die fnuiking van haar ontluikende liefde, en die tergende geheim van die Middeleeuse kasteeltoring.
Wat gaan dáár aan?
Altaarvure op Kandavu
Marika Lubbe moet die ongenaakbare dr. De Wet Zandberg na die Fidji-eilande vergesel om sy dogtertjie Marietjie, 'n poliolyer, te versorg. En daar, by 'n hospitaal vir melaatses, kruis hul paaie met Irene, De Wet se vervreemde vrou, wat saam met dr. Graciël Engelhardt die hospitaal beheer. Wanneer De Wet én Graciël nie meer hul aangetrokkenheid tot die mooi Marika kan wegsteek nie, begin Irene haar strikke span om haar man terug te wen.
Marika beleef nie net die nagmerrie van botsende verhoudings nie, maar ook die afgryse van 'n siekte-epidemie, die verskrikking van mense wat geoffer word, en Marietjie wat ontvoer word, die donker woude in.
Koninkryk van Ricardo
'n Jong onderwyseres, Antoinette Duvenhage, gaan na St.Ronaldo, 'n afgeleë eiland, vir die vakansie van 'n leeftyd. Of só glo sy.
Maar gou ontmoet sy die man aan wie die hele eiland behoort, Ricardo d'Silva. En aan sy sy: die kil skoonheid Marcelle wat Antoinette brandmerk as mededinger om Ricardo se liefde. Niks kan Marcelle hierna in haar haat stuit nie. Sy ken geen genade nie, en die jong Antoinette staar 'n afgryslike dood meer as een keer in die oë.
