Fees van die ongenooides - PG Du Plessis

Die Anglo-Boereoorlog lê al vier dekades in sy verlede, maar waar 'n oudoffisier uit die Britse magte van daardie tyd oor 'n paar bundels halfverbrande foto's in 'n museum se argief buig, verhelder die beelde tot die oorlogsversteurde lewens wat hulle eens was. Ook sy eie aandadigheid spook uit die beelde op. Maar oor en deur al sy herinneringe is daar die onuitwisbare beeld van 'n vrou, een wat aangeraak is deur oorlog se wreedste betasting.

In Fees van die ongenooides oorrompel P.G. du Plessis die leser met skreiende en skokkende gebeure in die lewe van mense wat in rustiger tye so anders sou wees, toegespin in die kokon van vrede en sy illusies van beskawing. Maar in die mense van die verhaal groei daar uit die geweld van oorlog vreemde en ongehoorde dinge. Die oorlog ontneem hulle nie net hul vryheid nie, dit vat ook die eie beheer uit hulle lewe weg en laat kankers in hulle groei uit dinge wat hulle nie kon verhelp nadat hulle hul weerbaarheid moes prysgee nie.

Die foto-bundels voor die ou offisier kom van Joey Drew, die fotograaf wat eers trots gemeen het sy kamera sal onthou wat almal sal wil vergeet. Die blik deur die lens leer hom egter anders kyk, en hy kan nie verduur wat hy sien nie. Maar sy beelde laat weer vrae uit die geskiedenis opstaan — oor mense en die dinge wat hulle beroer.

Daarom vra Fees van die ongenooides vrae oor ons glo, ons liefhê, ons strewes, die lieg in ons en ons onthou.

En stellig die klinkklaarste antwoord op die vrae wat die verhaal opwerp, is die feit dat hierdie roman 'n onvergeetlike leeservaring is.

407 bladsye

Vorige eienaar se naam en ander inligting is voor in boek geskryf met pen. Boek verder nog in baie goeie toestand.