FEITEGIDS, 'n Kern-ensiklopedie - Isabel Uys

Uitgewer: PHAROS, 650+ bladsye, sagteband

Feitegids – ’n Kernensiklopedie deur Isabel Uys (Reference)
 
Resensie deur Elzette Boucher - Al ooit gewonder wanneer die Honderd Jaar Oorlog was, hoeveel mense in die Groot Griep omgekom het of hoe om ’n tradisionele gereg soos pampoenkoekies voor te berei? Pharos se Feitegids bied jou die antwoorde.

“Feitegids” is ’n kompakte boek wat maklik is om te gebruik, veral vir leerders, onderwysers, joernaliste of ander nuuskieriges. Die boek bevat duisende feite wat in elf afdelings gerangskik is. Daar is inligtingskassies en tabelle, foto’s en kaarte, en ’n inhoudsopgawe en register wat dit maklik maak om inligting te vind – oor Suid-Afrika, die heelal, die aarde, lande van die wêreld, geskiedenis, die menslike liggaam, sport, die kunste, plante, diere en vele meer.

Die gids hoef ook nie noodwendig op die boekrak saam met ander naslaanbronne stof te vergaar nie, dis ook ’n lekker boek om deur te blaai en ontspannenderwys jou verwysingsraamwerk te verbreed. Beslis ’n moet vir elke huisgesin.