Gedenkboek van die Dorslandtrek - Prof. Dr. J. P. Jooste (samesteller)

VOORWOORD VAN DIE SAMESTELLER

In Augustus 1973 het ondergetekende n versoek van die Reëlingskomitee vir die eeufees van die Dorslandtrek ontvang om n gedenkboek oor die Dorslandtrek saam te stel. Verder is meegedeel dat die eeufees gedurende die Junie/Julie-vakansie van 1974 gevier sou word en dat die boek dan gereed moes wees om tydens die fees verkoop te word.

Aangesien die versoek nie in alle opsigte duidelik was nie, is uit verdere korrespondensie die volgende aanduidinge gegee deur die komitee: Die begrip Dorslandtrek moet meer insluit as net die Trek tot in Angola maar ook die verblyf aldaar tot 1928 en die Trek terug na Suidwes-Afrika totdat die mense min of meer hulle voete in die nuwe land gevind het; die boek moet sowel die burgerlike as die godsdienstige lewe behandel en populêr-wetenskaplik gestel word sodat die boek verteerbaar kan wees lekker kan lees vir die gewone man.

Dit was om meer as een rede n moeilike versoek, want die tyd was min en n wye veld sou gedek moes word. By voltooiing van die taak is dit nodig om op een en ander die aandag te vestig. Die ongepubliseerde bronne was meesal in Nederlands en Engels gestel dus moes die inhoud in Afrikaans weergegee word; verder is in die bronne, ongepubliseerde sowel as gepubliseerde, die vreem-de name van persone en dorpe dikwels verskillend gespet en in verskillende gevalle is die name van persone ook nie voluit gegee, slegs mnr. die of die, sodat in hierdie opsig sekere afwykinge van die reëls sal voorkom.

Plekname is ook dikwels in rapporte en ander stukke verskillend aangedui sodat ook in hierdie opsig daar moontlik verskillende spellings mag voorkom. Wat die aanduiding van die geld betref, is met die goedkeuring van die komitee die rand-sent-aanduiding in hakies agter die destyds geldende muntstelsel aangebring.