Verskeie van my oudkollegas en vriende het by my gepleit om die gebeure in die Suid-Afrikaanse Polisie tydens my dienstyd te boekstaaf en so daardie deel van ons geskiedenis in perspektief te plaas. Ek het weggeskram en gehoop een van my voorgangers, genl. Johann Coetzee, sou die taak op sy skouers neem. Hy het trouens dikwels tydens ons gesprekke te kenne gegee dat dit sy voomeme is, maar hy is oorlede sonder dat hy daarby uitgekom het. As laaste kommissaris van die SA Polisiemag wat oor dekades heen wet en orde in Suid-Afrika gehandhaaf het te midde van terreur en politieke konflik, ag ek dit my plig om my verhaal te vertel as huldeblyk aan al my oudkollegas wat alles vir hul taak veil gehad en hierdie land en sy bevolking met oorgawe gedien het. Hulle het net een strewe gehad: om te beskerm en te dien. My verhaal is ook die van duisende oudkollegas wat steeds kosbare herinneringe het aan n polisiemag wie se roemryke verlede deur propaganda en gditieke uitbuiting besoedel is. Van my voorrnalige kollegas se wedervaringe word ook geskets om die rol wat die Suid-Afrikaanse Polisiemag in die geskiedenis van ons land gespeel het, beter toe te lig.

Generaal Johan van der Merwe