Goue Jare : Die Verhaal van die Nasionale Krugerwildtuin - U. de V. Pienaar

**Boek bevat begrafnisprogram van die skrywer**

Hierdie boek gee die outentieke geskiedenis van die Nasionale Krugerwildtuin op n chronologiese en ekologies georiënteerde wyse weer. Dit vertel die verhaal van die wildtuin se mense en van sy plant- en dierelewe, groot en klein. Die leser kry ook insae in gebeure en bestuursbesluite wat hierdie grootse bewaringsgebied help vorm het. Dit begin in 1946 met die aftrede van kol. James Stevenson-Hamilton (die parkhoof tydens die pioniers-era) en eindig toe Dr. Pienaar in 1991 die tuig neergelê het.

Terselfdertyd is hierdie werk ook die outobiografie van die skrywer, wat veral sy verbintenis van 36 jaar met die nasionale bewaring,s-gebiede onder toesig van die Nasionale Parkeraad (SANParke) toelig. Sy kleurryke loopbaan het in 1955 begin met sy aanstelling as junior veldwagter in die Krugerwildtuin, en in 1991 geëindig toe hy as hoofdirekteur van Suid-Afrika se nasionale parke afgetree het.

In die slothoofstuk besin dr. Pienaar oor die voortbestaans-moontlikhede van die Krugerwildtuin as n unieke ekosisteem, indien daar met die huidige bestuurstrategie volgehou word.

n Meer geskikte persoon om met soveel eerstehandse kennis en insig die geskiedenis van die Nasionale Krugerwildtuin te boekstaaf, sal moeilik gevind word.