Groote Schuur, Woning van Suid-Afrika se Eerste Minister. Groot formaat. H/B. 127 pp.

n Kosbare kultuurskat wat Groote Schuur, die geskiedkundige woning wat Cecil Rhodes aan die toekomstige eerste ministers van Suid-Afrika bemaak het, aan die leser bekend stel.

Dié omvattende tweetalige gids beskryf die argitektuur van Groote Schuur, die kosbare meubels en tapisserieë daarin, die porselein, glasware en erdewerk, die silwerware, brons, koper en geelkoper, skilderye, die Zimbabwe-relieke en die tuin in fyn detail. Die boek is op glanspapier gedruk en bevat dosyne fotos in swart-en-wit en kleur.

Die boek is in n uitstekende toestand met n stofomslag wat deur n plastiekoortreksel beskerm word. Op die halftitelblad verskyn n geskenkinskrywing wat aandui dat die boek deur die Nasionale Vroueklub van die Parlement aan mev Braampie Malan geskenk is. Sy was in 1970 sekretaresse van die klub en vrou van mnr JJ Malan, destyds Adjunk-miniter van Landbou.

Die boek is in 1970 deur die Departement van Inligting onder die redakteurskap van WJ le Roux gepubliseer. Groot formaat: 32 (H) cm x 24 (B) cm.