Katrientjie - Sarah du Pisanie

Katrientjie - Sarah du Pisanie - JP van der Walt - 1986, eerste druk - 152pp - Hardeband in goeie toestand - stofomslag toon rakverweer - Intern: een naamstempel voor in boek, res skoon en stewig gebind.

Dit is die jaar 1910. Suidwes word deur ‘n vreeslike droogte geknel, en boonop breek daar bek-en-klouseer uit in die noordelike deel. Die boere in hierdie streek word dus genoop om so gou moontlik hulle vee te verkoop, voordat hulle nie meer kan nie en dan hulle plase verloor.

Katrientjie Viljoen is deur haar oupa en ouma grootgemaak, en noudat hulle al te oud is om die werk op die plaas self te behartig, rus hierdie taak byna geheel en al op haar skouers. Sy, oupa Faan en ouma Stien vorm een van die gesinne wat in hierdie netelige situasie met die boerdery verkeer, en toe oupa Faan hoor van ‘n koper van Windhoek vir hulle beeste, besluit hulle om dadelik te verkoop.

Daar is egter een groot probleem. Die eienaar moet self die beeste aanjaag tot by Windhoek, en daar is niemand om saam met die beeste te trek tot daar nie, behalwe Katrientjie self. Sy stuit egter voor niks nie, en sy besluit om self die trek mee te maak in ‘n ossewa saam met vier beeswagters en ‘n ou Hererovrou. Aan die stories wat die rondte doen dat ‘n bende rowers die trekke uit die noorde voorlê en die vee steel, steur Katrientjie haar min. Sy vind egter deeglik uit dat die stories wél waar is toe hulle haar ontvoer en een van die rowers haar ‘n hele week alleen in ‘n hut in die berg aanhou .

Katrientjie is ‘n opwindende verhaal oor die wêreld van Suidwes in die eerstejare van hierdie eeu wat bewonderaars van Sarah du Pisanie sal meevoer.