Koekemakranka, Khoi-Khoin-Kultuurgoed en Kom-Kuier-Kos.

Deur Renata Coetzee en Volker Miros.

Uitgegee deur Lapa 2009. Eerste uitgawe. Hardeband, 175pp. 

Baie goeie toestand. Meer as 1kg.

Koekemakranka, Khoi-Khoin-Kultuurgoed en Kom-Kuier-Kos, saamgestel deur Renata Coetzee, is aangewys as die Suid-Afrikaanse wenner in die internasionale Gourmand World Cookbook Awards 2010 se kategorieë “Best Culinary History Book” en “Best Cookbook”.

Die Gourmand World Cookbook Awards is die enigste ware internasionale kompetisie vir kookboeke. Die toekennings wil diegene wat “met woorde kook” bekroon, deurdat dit kleiner internasionale boeke die kans gee om in hooftaalmarkte mee te ding, en is verder daarop gemik om kennis oor en respek vir die kos- en wynkultuur aan te kweek.

As wenner van die Suid-Afrikaanse fase van die kompetisie word Koekemakranka ’n finalis in die algehele kompetisie, waar die wenner met die gesogte titel van ‘Gourmand Best in die world’ sal wegstap.

Renata Coetzee het haar uitgebreide navorsing oor die Khoi-Khoin se eetkultuur in hierdie pragboek vir die breë publiek toeganklik gemaak. Talle vertellings regstreeks uit die mond van ’n paar Khoi-Khoin wat nog onthou hoe dinge ’n paar dekades gelede gedoen is – en dalk plek-plek nog gedoen word – omskep die boek in ’n unieke leeservaring. Vir die bewaringsbewustes is daar volop raad vir die aanlê van ’n eie veldkostuin en om seker te maak dat die Khoi-Khoin se kom-kuier-kos op almal se tafels kan voortleef, word die boek met ’n verskeidenheid resepte afgesluit. Foto’s deur Volker Miros maak dié hardebandboek ook uiters besonders.

‘Bladsy na bladsy ontsluit die boek ’n fassinerende oeroue inheemse kultuur- en volkskuns, lieflik beskryf en geïllustreer. Lees-lees en proe-proe pas die legkaartstukkies van ons gemeenskap se verlede in mekaar en verbreed dit ons begrip oor ons land se mense,’ skryf Kerneels Breytenbach.

Renata Coetzee het ’n eredoktorsgraad ontvang van die Noordwes Universiteit vir haar dekades lange navorsing oor die eetkulture van die inheemse mense van Suid-Afrika.

Boeke wat uit haar navorsing gespruit het, is onder meer Funa Food from Africa – Roots of African Food Culture en Spys en Drank – die oorsprong van die Afrikaanse eetkultuur.