Published by Raad vir Geesteswetenskaplike Navorsing, 1992

Soft cover in good used condition. 

As poort na Afrika vir sendelinge, handelaars, jagters en ontdekkingsreisigers was Kuruman stellig die bekendste plek in die Suid-Afrikaanse binneland gedurende die 19de eeu. Deur die werk van die sendelinge onder die Suid-Tswana word die Christelike godsdiens, die eerste Bybelvertaling in n swart taal, Westerse opvoeding en gaandeweg ook tegnologie en kultuurprodukte uiteindelik van Kuruman af na die voorheen ontoeganklike Afrika uitgedra.

Kuruman se geskiedenis eindig egter nie by hierdie sosiaal-kulturele erfenis en bykans romantiese verhaal van sendingwerk en ontdekkingsreise nie. Die pad na die binneland deur Kuruman word ook die weg vir die uitbreiding van die kapitalisme, imperialisme en gevolg-like kolonisering van swartmense soos die Tswana en Ndebele. Weerstand daarteen lei tot militêre onderwerping, sosiale ontwrigting en helaas ingrypende verarming. Terselfdertyd baan kolonisering die weg vir blanke besetting en uiteindelik die aanlê van n dorp by Kuru-man se wêreldberoemde Oog.

Rondom die eeuwisseling vervul Kururnan n sleutelrol op militêre gebied tydens die Langeberg-rebellie, Tweede Anglo-Boereoorlog, die 1914-rebellie en die veldtog na Namibië gedurende die Eerste Wêreldoorlog. Gedurende die 20ste eeu ontwikkel Kuruman tot n vooruitstrewende plattelandse dorp waar die komplekse Suid-Afrikaanse samelewingsproblematiek voltrek word. Die dorp en distrik word onder meer swaar getref deur grootskaalse gedwonge verskuiwings en die skepping van n nie-lewensvatbare tuisland maatreëls wat n deel van die bevolking van die welvaart na die Tweede Wêreldoorlog uitsluit.

Op ekonomiese gebied dien tydige koersveranderings in die landbou, die gepaardgaande verbreding van die ekonomiese basis deur mineraalontginning en n bloeiende handelsektor as dryfveer vir gemeenskapsontwikkeling. Kuruman word inderdaad die.sentrum van die blou-asbesbedryf in Suid-Afrika.