Liefde is sterker as die Dood - Konsalik

Liefde is sterker as die dood - Konsalik - Tafelberg - 1976, eerste druk - 204pp - Hardeband met stofomslag in goeie toestand - Intern skoon en stewig gebind.

Posgeld en verpakking R28.00

Op ’n sonnige oggend in Parys ry die skilder Pierre ’n meisie raak. Sy lendelam fiets breek uitmekaar en die blondekoppie verdwyn al hinkende nadat sy hom met blitsende, diepblou oë afgesnou het. Kort daarna sien hy haar weer – op die punt om van die Arc de Triomphe af te spring.

Uit hierdie dramatiese begin groei die verhaal van Pierre en Ev, van hul gloeiende geluk en hul ontreddering teenoor die magte wat daardie geluk wil verwoes. Die middelpunt van die roman is Parys, die stad van liefde. Maar ook die sonnige Provence word beleef en Camargue met sy velde en vleie, sy duisende flaminke en spierwit perde. Vanuit hierdie droomwêreld beweeg die verhaal na ’n klimaks wat die meelewende leser sal ruk.

Onvergeetlike karakters kom staan voor die oog: die massiewe madame Coco, growwe ou moeder met die sagte hart; Rooi Henry, die goedige pruldigter; Gebedeboek, die student in die teologie wat kerke afgeskaf wil hê; Ponpon, die eenoog-slangmens; die taximan Wladi, wat eintlik ’n Russiese prins is; Callac, die beroemdste kunshandelaar in Parys, wat skelm konjak drink… en Bouillon, die lelikste hond in Parys.

Ten slotte is dit egter Pierre en Ev wat die leser die langste sal bybly. Hulle ontlok ’n deernis wat ’n mens net kan ervaar teenoor diegene wat jy intiem leer ken het. Só innig verbeeld Konsalik die lotgevalle van dié twee jongmense dat LIEFDE IS STERKER AS DIE DOOD bestempel kan word as die teergevoeligste roman wat nog van hom verskyn het.