Marthinus Theunis Steyn – ‘n Lewensbeskrywing - N. J. van der Merwe (Deel 1)

Wie die ongekunstelde nederigheid en grootse eenvoud van pres. Steyn se karakter geken het, sal dit nie bevreemdend vind nie dat hy oor sy eie lewensbeskrywing haas nie te spreek was nie. Van n uitgawe nog tydens sy lewe en met sy imprimatur wou hy beslis nie hoor nie.

Ses dae voor sy dood het die skrywer hom vir die laaste maal gesien. Die President was opgewek en sy gesondheid buitengewoon goed. n Versoek van iemand uit die Transvaal om verlof te bekom om die lewe van die President te beskrywe en uit te gee, het die saak van n biografie te berde gebring. Soos altyd het hy hom daarteen versit. Tog het dit gelyk of hy dié slag ernstiger daaroor nagedink het; want nog dieselfde dag het hy aan die skrywer gesê dat as die geskiedenis van die Vrystaat dit tog verg dat sy lewensgeskiedenis sal beskrywe word, dit sy verlange was dat die skrywer, mits hy daar behae in skep, die persoon sal wees wat die werk ter hand sal neem.

Die opdrag word dadelik as n eer en voorreg aanvaar. Wat sou makliker wees en aangenamer as om van tyd tot tyd Onzerust te besoek, toegelaat te word tot die verbasende skatkamer van president Steyn se geheue en dit vir die nageslag te bewaar ?