Murasie - Chanette Paul

Die Strandveld loop dik van stories.  Veral stories oor Verlatenfontein en die tyd toe die Brewisse daar gebly het.  Oor Bert Brewis en sy humeur en oor sy beeldskone Engelse vrou.  Ook oor hulle twee dogters - die oudste te vaal om hubaar te wees, die jongste 'n bottende skoonheid.  En oor die woedegeen wat so sterk loop in hierdie luisterryke, vooraanstaande familie.

Ras Erasmus ken feitlik elkeen van hierdie Verlatenfontein-stories soos oorvertel deur sy Ouma Kate.  Op haar doodsbed laat sy hom drie beloftes aflê.  Die kans doen hom voor om hierdie beloftes na te kom toe hy 'n kwotasie moet uitwerk vir die restourasie van die opstal op Verlatenfontein nadat dit vir die vierde keer in honderd en twintig jaar net halfpad afbrand - raaiselagtig genoeg, telkens op 'n betekenisvolle datum.

Maar hy het nie rekening gehou daarmee dat daar 'n huurpag op 'n gedeelte van die plaas bestaan nie.  Die huurpag is duur gekoop - nie soseer met geld nie, met 'n veel duurder kommoditeit.  Eers toe Georgie Rabie Verlatenfontein toe moet vlug na 'n twiet wat haar baie suur bekom het, hoor sy wat werklik die geskiedenis is agter die huurpag wat haar peetma hou.  'n Huurpag waaragter Ras Erasmus aan is, en nie net hy nie.