Njarabeb die Ratel deur Jan J. Van Der Post (EERSTE UITGAWE)

151 Bladsye, Hardeband
22cm x 14cm
EERSTE UITGAWE 1970

Waarom moes die mooi Tamarie na die onbekende land van die maan toe loop ? En waarom moes die ou vrou wat Njarabeb op die veld neergesit het, met haar bloed betaal ? En die onskuldige musiekmaker ? Hy wat geen plek op die veld het nie en van die een vuur na die ander swerf om vir die mense van die veld nuus van ander vure oor te dra. Jan J. van der Post se jongste verhaal oor die Boesmans van Suidwes vertel van 'n moordenaar in die midde van een van die klein nomadiese groepies.

Maar is Njarabeb bloot 'n gruwelike moordenaar wie se kopmurg deur die son gaargebrand is, of was die moorde 'n geloofsdaad ? Hy is tog immers die grootste jagter van sy groep en as slimme ken hy al die geheime van die maan. Daar is geen wettige rede vir hom om iemand uit jaloesie dood te maak nie. Een vraag bly hom egter kwel : wie het die maan gemaak ? En hierdie vraag keer elke keer kwellender as ooit na hom terug. Daarom het hy die maan se oppermagtige heerskappy uitgedaag. Hy kan mos sterker wees as die maan!

Njarabeb die Ratel is 'n verhaal wat diep setel in die religieuse en rituele oortuigings van die Boesman. Maar dis nie al nie : Dis 'n opwindende verhaal vol ontbering, avontuur en spanning van 'n klein klompie mense verlate op die veld.

En Van der Post ken hierdie geharde ou kleintjies. Hy skryf met so 'n verstommende insig en deernis oor hulle dat mens nooit twyfel aan die geloofwaardigheid van die verhaal nie. Die lot van Njarabeb, die mooi jong slimme, is tot aan die einde in die weeg-skaal. Is hy doodmaker of weldoener ? Hoekom maak 'n goeie jagter sy eie soort dood ?