Sinvolle Tuinontwerp

Vir baie mense behels tuinmaak veel meer as bloot 'n groen grasperk en mooi plante wat daarby pas. In die afgelope paar jaar het die klem verskuif na die ontwerp van 'n suksesvolle tuin en die versorging war daarmee gepaard gaan. Moderne tuine toon 'n baie meer persoonlike aanslag en is veel eerder 'n uitdrukking van individuele leefstylkeuses.

Daar is egter so 'n magdom van inligting beskikbaar oor tuinmaak en wat om te plant, dat baie tuinliefhebbers oorweldig, selfs magteloos voel, en maar in hul onkunde voortploeter terwyl hulle wens daar was 'n toeganklike manier om 'n tuin van meet af aan reg te beplan en die geskikste plante te plant.

In hierdie bondige en sistematiese publikasie het die skrywers hul gesamentlike kennis, jare lange praktiese ervaring en hul onderskeie beproefde onderrigmetodes saamgesnoer om 'n werk die lig te laat sien wat die beginnertuinier en ook die kenner sal help om 'n aanskoulike en suksesvolle tuin te skep. Die illustrasiemateriaal is uitsonderlik en op sigself 'n skatkis van inspirerende idees. Sinvolle tuinontwerp is 'n stap-vir-stap gids wat enige tuinier of voornemende tuinier sal help om 'n tuin te skep of te herskep.
Dit bevat praktiese oefeninge en wenke, en is 'n i

nteraktiewe verwysingsbron vir die fundamentele onderwerpe van tuinontwerp en -beplanning. Dit sluit die basiese stappe in om 'n langtermyn-meesterplan vir 'n tuin op te stel; leiding rakende belangrike besluite soos watter tuinstyl die woning gaan komplementeer, geskikte plante vir die klimaat, verantwoordelike waterverbruik, arbeidbesparende tegnieke en sekuriteit - alles binne 'n gemeenskaplike Suid-Afrikaanse konteks.