Skoppelmaaijare 'n Lang pad met Bipolere Depressie - Esje du Toit

SKOPPELMAAIJARE – ‘n Lang reis met bipolêre depressie, deur Esje du Toit (GETEKEN) - 2011 - Naledi - Sagteband in besonder goeie toestand.

Posgeld en verpakking R25.00

Esje du Toit, gebore net buite Stanford, is ‘n bekende figuur in die Overstrand. Sy het veral naam gemaak as skrywer van boeke oor die omgewing. Sy het self haar boeke gepubliseer, wat ekstra werk, moeite en waagmoed vereis. Maar onlangs het die uitgewery Naledi besluit om Esje se lewensverhaal en haar stryd met gemoedversteuring te publiseer.

Dit is ‘n nuwe weergawe van ‘n boek wat Esje twaalf jaar gelede geskryf het, met nuwe inligting oor die hantering van ‘n probleem wat al hoe meer algemeen voorkom.
In Esje du Toit se boek Skoppelmaaijare reis die leser saam met die skryfster op haar lang en eensame pad met bipolêre versteuring en beleef saam met haar die aanvanklike verwarring en onkunde oor die redes en aard van die siekte wat ‘n so ingrypende uitwerking op haar lewe gehad het.

Sonder om doekies om te draai, beskryf Esje die skoppelmaaigang van haar lewe wat deurentyd van lig na donker geswaai het, asook die uitwerking van die swaaie op haar professionele lewe en interpersoonlike verhoudings.

Esje het reeds 27 jaar aan bipolêre versteuring gely voordat sy self begin het met intense navorsing om meer te wete te kom oor die manies-depressiewe siekte en deur haar studie daarin geslaag het om ‘n reeks vaardighede aan te leer wat haar toenemend in staat getel het om die siekte te bestuur.

Skoppelmaaijare is meer as die verhaal van ‘n bipolêre lyer se stryd teen die siekte – dit is ook ‘n praktiese gids om nie net ander bipolêre lyers te bemagtig nie, maar ook die samelewing, wat dikwels onsimpatiek en onkundig teenoor die siekte staan, in te lig.