Vlieë teen die ruite - Kas van den Bergh se eerste roman Eerste Uitgawe

“SO gaan die ou lewe, Sarel. Ons is die vlieë teen die glas. Ons sien al die mooi onbereikbare dinge en dan wens ons dat ons dit alles kan kry.”
 “Ja, oom Thomas, ons sal dit nooit verstaan nie. Ons is soos vlieë, soos Oom gesê het. Soos vlieë teen die ruite.”
Oppervlakkig beskou, is hierdie wek die verhaal van Sarel Pieterse en sy gesin – Sarel Pieterse wat gevlug het vir die droogte, omdat hy nooit weer die son wou sien doodgaan in ‘n oneindigheid van stof nie. Maar dit is meer as dit - dit is die universele verhaal van die mensdom wat gedurig strewe, maar tog nooit weet waarna nie, omdat dit altyd net buite bereik bly. Dit is in elk geval nie die verhaal van ‘n enkele persoon nie, maar van ‘n groep.

Kas van der Bergh skilder op ‘n groot doek, tog is sy detail boeiend. Die lotgevalle van elkeen van sy karakters is ‘n verhaal op sigself, maar dit is die geheelbeeld wat onthou word.

In 1949 het die tydskrif-lesende publiek begin kennis maak met ‘n nuwe naam toe Kas van den Bergh sy eerste kortverhaal gepubliseer het. Met Vlieë teen die Ruite bied hy sy eerste boek. Ons glo dat die leser hom daarvoor baie dank verskuldig sal bly.